بدون عنوان..

بقالنا كتير مكتبناش نكتب شوية بقى.. حاتكلم شوية عن رمضان، بغض النظر عن المسلسلات كلها حنختلف في الفايدة والمبادئ مع ان المفروض منختلفش في كده واكيد حنتفق ان مدفوع فيها فلوس كانت قضت على الجوع في مصر.. 

المهم بقى ان مش ده موضوعي، حد واخد باله من حاجة مختلفة ؟ احنا اتغيرنا كتير يعني بغض النظر حلو ولا وحش بس في تغيير.. يعني اعلان زي اعلانات موبينيل بتاعة بنجمع ببطئ في رمضان لو من 3 سنيين بس مكنش فكر يعملها ولو كان فكر كانوا قالوا انه مجنون او ان الفكرة بايخة ومش حتشد حد..

بس الفكر اختلف، الناس بدأت تطلع شوية من مفهوم العادات والتقاليد وبتحاول تغير في حاجات بتعجب وتشد وفي حاجات مبتعجبش حد .. بس احنا لسه برضه في نفس المشكلة.. الصح صح لو انا عملته وغلط لو غيري عمله او بمعنى اخر الغلط انا بس اللي اعمله لكن لو حد تاني عمله مستحملوش واحكم عليه..

احنا راقصين على السلم، لدينا الدين ولكن فاقدين للعقيدة، معملناش كفاية للآخرة وادناها حقها ومش عايشين مبسوطين في الدنيا ومستمتعين بيها.. مين علمنا ان الغلط ينفع لو محدش شايفك ومينفعش لو في حد موجود .. سواء كان حد في الشارع، حد اعرفه، حد معرفوش، حد بحبه او حد بكرهه.. يمكن علشان كده الحجاب كان مقتبل وفجأة مبقاش حتى محتمل؟ 

يعني احنا كنا خايفين من بعض مكناش خايفين من ربنا ودلوقتي مبقناش خايفين من بعض طب وربنا؟ العمل بنيته لو فسدت فسد العمل.. ولو صلحت صلح العمل وتهذبت النفس.. 

مشكلة معظمنا انه مش صادق مع نفسه، بيعمل الصح وشايفه طبعا صح وبيعمل الغلط وشايفه برضه طبعا صح او بيبرره لنفسه عشان ميطرش يكون منظره مش تمام قدام غيره فتفضل دايما نفسه عزيزة عليه ومش مكسورة.. طب ومين قال ان اللي بيغلط ده انسان فاسد؟ هو مش احنا في اختبار؟ هو مش الله سبحانه وتعالى خلقنا غير كاملين (يعني ناقصين، يعني بنغلط، يعني انسان يعني مش من الملائكة)؟ وامرنا بالاستغفار؟ والتوبة؟

عارف ايه علاقة كل ده ببعضه؟ انك لو متقبل الخطأ في نفسك وانك غير كامل لتقبلته فب غيرك وانه ايضا غير كامل.. جرب لما تعمل حاجة غلط تكون عارف انها غلط وتعملها براحة نفسية وبرغم تأنيب ضميرك بس بعدها تستغفر وتسأل ربنا يسامحك وتطلب منه يزيح عنك الشهوة في المعصية ويستر عليك فيها..

لو ده مجتمع بس عايز يشوف الحلو في الآخر فهو مجتمع ناقص وغير متوازن.. تقبل العيب في غيرك من غير ما تنتظر مبرراته، فهو مش مطالب منه يببرلك.. انا لو عملت الغلط استاهل منك تنوهلي وتساعدني باللي ربنا يقدرك متحتقرنيش ولا تحكم علي.. 

ومن النهاية انت شايف الناس زي ما انت شايف نفسك.. وحشين علشان انت شايف انك وحش وميتاهلوش يتحبوا علشان انت شايف انك متستاهلش انك تتحب، حلوين علشان انت شايف ان نفسك حلوة وبتحبهم وتحترمهم علشان بتحب وبتحترم نفسك اولاً وهي اولى منك بذلك..