ليه صعبة على ناس وسهلة على ناس؟

في ناس حياتها تبان اسهل من ناس تانية. مثلا عمرك ركبت مع واحد صاحبك حسيتها "سهلة"؟ كده الدنيا ماشية حلو ومفيش مشاكل و"متسهلة" .. لو عاز فكة موجودة، الركنة سهلة، الفلوس تمام.. إلخ

وصاحبك تاني اول ما تركب معاه تلعن اليوم اللي فكرت تنزل فيه من بيتك معاه. ماشي يتخانق والدنيا سودة في وشه مفيش بعد كده. قعدت فكرت في الموضوع ده كتير.. ليه الناس بتختلف، وقلت ده مش عدل عشان في من الناس اللي حياتهم صعبة اوي دول ناس فعلا طيبين وعاملين اللي عليهم خلقاً وديناً وعلى العكس في في اللي حياتهم متسهلة دول ناس .في دنيا تانية ولا هي هنا ولا عارفة هي عليها ايه. 

لقيت الاسباب كتير، من وجهة نظري ان مش شرط يكون بيعمل اللي عليه ممكن بس يكون متعّود يكدّر نفسه.. متعود ينفخ وينطر ودايما متوقع "التعسيف" بدل للتفاؤل وبدل "ان شاء الله حتمشي"..

عامل تاني؛ الفلوس.. خلينا نكون واضحين ومتفقين على ان كتر الفلوس دايما يعني كتر رفاهية ومتعة.. كل حاكة تحسها سهلة كده، معيش كذا نسيته في البيت خلاص حروح اشتري غيره من اي حتة وايه يعني .. معيش بنزين هاتولي بس سكة اقرب بنزينة.. عايز اكل في حتة اي مطعم مش مهم واللي نفسي فيه كمان.. بس فكرت ان الفلوس ممكن تكون ابتلاء؟ كل ما زادت القيمة المادية للاشياء كل ما زاد الطامعين. يعني مثلا مش حتتسرق فيزتك لو انت بتمشي ب٢٠ جنيه في جيبك ومعكش فيزا اصلا! ومش حيتسرق النوكيا بتاعك اللي محدش بيبصله اليومين دول وكله شغال سامسونج وتاتش وكده.. خلاصة الكلام انها معادلة كاملة التوازن، انت متعرفش ازاي ومش حتعرف ولا ليك انك تاخد بالك بس خليك متأكد ان مش ده العنصر المسبب.. 

امال ايه العنصر المسبب؟ في رأيي "حالة العقل" هي السبب في كل حاجة بنواجهها، The state of mind. كل ما تحط في عقلك افكار كئيبة ومملة وصعبة حتجييلك كل حاجة كئيبة ومملة وصعبة لانك ببساطة مش بتشوف الجانب الحلو بتاع كل حاجة، بتشوف الوحش بس.. لكن لو متوكل ومسهلها على نفسك وبتاخد كل حاجة وحشة بتحصل تشوف ايه الحلو فيها و"تفائلوا بالخير تجدوه" مش حتلاقي اسهل من كده وحتكون انت صاحبك اللي لما بتركب جمبه بتحسها "سهلة" و "ماشية" و "مريحة".. عقلك أداة استخدمها ومشيها زي ما تحب تكون حياتك..