استعراض..

بغض النظر عن الفالنتاين بس قلت اتكلم عن حاجة اهم لافتة انتباهي من فترة.. فاكر اخر مرة شوفت فيها صورة حسيتها ذكرى حلوة مش استعراض؟ طب فاكرين لما الفيسبوك كان مكان مشاركة مش مسابقة ملوك جمال؟ 

انا بكره انستجرام .. مش عشان الناس مبسوطة وزايطة في لا والله دي حاجة تسعدني بس ليه بتمثيل؟ ليه كل ما بتجيلنا فرصة نستخدم حاجة صح بنبوظها.. 

موضة.. حياتنا كلها موضة.. انا قررت اعمل فيسبوك عشان الناس كلها عاملة مش عشان حاجة.. وبالنسبة لانستجرام بقى عشان الناس كلها راحتله، اهو عندي سبب مقنع اهو..

انا نسيت امتى اخر مرة اتصورت فيها عشان منساش اليوم ده مش عشان افرج الناس قد ايه حياتي جميلة.. اللي اغلبنا ميعرفوش واللي يعرفه ناسييه للأسف ان ظاهري الشئ وكثيري التباهي بيه هم اكثرهم افتقاراً له.. اللي بيهدد دايما ضعيف عشان لو كان في حاجة يقدر يعملها مكنش هدد.. والذكي مبيقولش على نفسه ذكي الناس فيه كده وبتقوله وبيفضل يشكك فيهم عشان لو يوم صدقهم حيخسر ذكائه.. اينشتاين عمره ما قال على نفسه عبقري مع ان العالم كله كان ولسه شايف كده.. حاولت توصللي انت ايه من صورك عشان مجاليش؟

انتي قد كده شايقة انك وحشة والصورة والناس واللايكس بيجملوكي؟ ما اهو اصل مش طبيعي يا جماعة البنت بتحط عشر لعشرين صورة لنفسها في نفس اليوم كل يوم في كل حتة..

حد من اصحابي مرة قالهالي لما قلتله لازم كل يوم اكون فيه مع الناس اللي بحبها اتصور عشان مانساهوش، قاللي فكري فيها ان كل وقت بتضيعيه في الصورة الذكري نفسها بتروح منك ولسخرية القدر انا فعلا روحت وشوفت صوري اللي اتصورتها قبل كده مفتكرتش اي حاجة في اليوم غير اننا كنا بنحاول نتصور ومعملناش حاجة تانية يومها..

الموضة حلوة واللبس الجديد مفيش احلى منه بس المنظرة بتبوظه.. ليه منضيعش وقت على نفسنا اولى بدل ما هي كلها بتعدي على الاقل نفسي ابقالي وحتسأل عنها.. 

حس بالحظة وبقيمتها قبل ما تتباهى بيها.. 

 

الملأ منبهر بس في ملأ اولى انك تخاف/ي منه..

 

مش حتاخد ثواب على البي ام دبليو ثوابك على الناس اللي ساعدتها بيها .. بيتك وعفشه وكده غالي وجميل بس ده مش مقياس حساب، لكن الاستضافة واكرام الضيف ايوه.. حاول تنسى كام واحد حيعرف انك عملت حاجة حلوة واعملها بس عشان هي حلوة لأن ده اسمى..

الوحش في السطحية انها بتستحملش العمق ولا بتمشي معاه، زي لما تقرى كتاب وتبقى نفسك الناس كلها تتعلم منه زي ما انت اتعلمت منه بس للاسف هم مستهيفيينه ومستهيفيين انبهارك انت شخصيا بالعلم..

انا بحب باسم يوسف بس نفسي كان يكون هادف وبدل ما بس يضحكنا كمان يعلمنا.. 

انا قررت ولو وصلت معايا لهنا من المقالة دي حكون سعيدة انك تكون معايا في قراري، ان اي حاجة حعملها بعد كده حعملها عشان ليها لازمة وبسبب مش العكس، مش حعملها وادورلها على سبب مقنع عشان على الاقل يوم اما اُسأل قدام العامة مخذلش ربنا اني استخدمت النعم اللي انعمها عليا اسوأ استخدام وان كان ممكن اولى مني يكون مكاني وانفع لنفسه وللناس بديني.. 

انا مش هنا عشان انصحك انا يمكن بس بفكرك..

 

لو بتحب بقى روح اتفسح ولو لأ روح كل كيك وشكرا..