انت بتضربني ليه؟ هو انا عملتلك يه؟

عنوان المقالة؟ لأ عادي بس دي الحاجة اللي وصلتلها انهاردة بعد يوم سواقة "مشاوير" طبيعي.. هو في ايه يا جدعان؟ لأ بجد في ايه؟ انا اتشتمت فوق الاربع خمس مرات ومنهم كانت ست كبيرة -من بتوع يلا موضة واعمل شعري وارَوش ويلا محدش واخد منها حاجة- وقفت جمبي بالعربية مخصوص عشان تقنعني اني مجنونة ومحتاجة مساعدة وبقلها معلش ومفيش هي قفلت معاها "ده حاجة ترارللي خالص" سايز ذا اولد جريفي وومن.. احلى حاجة اني اللي عملته اني كنت بعدل عربيتي عشان واقفة صف تاني في شارع المعسكر الروماني فطبعا موقف زي ده خلاني روحت فكرت ميتيين مليون مرة في طرق علاجي.. اما التاني كان واحد طالع من شارع داخل وحينزل يبصملي بالعشرة اني انا اللي داخلة غلط وانه هو ادرى والرجالة دايما على حق واسمعي كلام سي السيد والجو ده..

فا في ايه برده محدش جاوبني يا جماعة؟ انا سافرت الغردقة خمس ايام حسيت اني روحت الجنة.. ناس هايصة وجو جميل ومتفائلين وصدرهم رحب كده، مش دي الكلمة اللي بيقولوها على الناس اللي مرحبة برده؟ طب دول ايه الفرق انا مش عارفة، محدش فيهم واخد قلم في نفسه ولا بيبص لنفسه في المراية بعوجان -اصله جامد اوي واللوك ميكملش غير بكده- ولا حد كلمني وحش ولا ضايقني ولا انا ضايقت حد، بغض النظر طبعا عن ان المصريين زي العسل في التعامل في المطعم او عند الاوض او حاجة بس اول ما نشوف بعض على البحر التبرييق يشتغل، بس والله احسن مليون مرة من الاجانب هما اه الاجانب ولا كانك موجود ملهمش دعوة بيك بس برده اتميين..

المهم اني برده مفمتش في ايه ولا هافهم ولا عمرنا ما حنكون قاعدين في مكان كرتاحيين طول ما كل واحد قاعد باصص شزراً للتاني او بيشبه عليه عشان ينم وكده ولا طول ما الشارع ارض سباق وتحدي وانا اللي حعدي الاول يلا وكده.. انا بس نفسي انزل الشارع وانا مرتاحة واقعد في مكان حد يبتسملي معرفوش بعد الشر.. يعني مفهاش حاجة لو يوم انت نازل رايق تستحمل واحد راجع من شغله تعبان يمكن ربنا يفتحها في وشك في حاجة ولا حاجة او حاجة..

انا عارفة ان اللي بيكتب المفروض بيوصل استنتاج للقارئ في الاخر بس انا بعتذر اني معندييش عشان انا محتارة في الناس وف اسلوب التعامل معاهم ف اللي يعرف يريت يقوللي، بس حل يكون بعيد عن كبري دماغك واقفلي الشباك بلاش سلبية حضرتك منك له.. 

اما بالنشبالي حروح اشوف ادور على كتاب اقراه في اساليب التواصل او حاجة يمكن الاقي حاجة كويسة اقدر اطبقها واعدي بيها الناس اللي حتولع في بعض دي او الحق اشوف حاجة لعلاجي عشان انا ترارللي وكده.. 

 واخر حاجة بقدملكوا اهداء اغنية انت بتضربني ليه للفنان  هشام
 https://www.youtube.com/watch?v=TnyixXEvQtQعفيفي وشكراَ..