اديني فرصتي بس..

احنا عايشين ليه؟ طب بلاش ده سؤال شامل وحتقول انا جيت الدنيا لقيت نفسي هنا.. طب انت/ي بتقرا المقالة بتاعتي دي ليه؟ عجبتك صورتي؟ زهقان؟ حد عملَها شير فقولت تشوف دماغي او بتديني نوع من أنواع الدعم ولاَ شدك اسمها؟ بما اني بسأل ليه انا برده لازم اقول انا بكتب ليه.. 

من رأيي المتواضع ومن خبرتي الشخصية في اللي بشوفه كل يوم حواليه، احنا عايشين والسلام.. كام واحد معتنق دينه عن اقتناع؟ اصل ماما وبابا مسلمين وماما قلتلي اتحجبي عشان متلفتيش النظر أو أو أو.... 

انت/ي بتلبس اللبس ده ليه؟ فكرت تغيَره؟ الولد اللي حبتيه، فكرتي ليه بتحبيه واذا بعد لما الحب يقَل بما ان كل حاجة بتبدأ كبيرة وتصغر حتعرفي لسه تشوفي عيوبه وتحبيها؟

كام مرَة قريت الكلام ده أو سمعته ومعملتش حاجة؟ كام مرَة حبيت حاجة اوي بس حسيت صعب توَصلها فقولت تسمع تامر عاشور وتسقط الكرسي وتفيَم زجاج العربية واصل انت ضحية  زي ما البلد كلَها ضحايا...

الشغل مش شوية احنا اللي منتعبش كفاية عشان نوصلَه، والشارع شكله مش وحش عينينا اللي مبقتش عايزة تقول على حاجة حلوة غير لَما تشوفها لأول مرَة.. شارع البيت مقرف لحد لما عمارة جديدة تطلع فنقول منهم لله بوَظوا الشارع وانت اصلا مكنتش مقدر جماله قبلها.. حتى الحاجة اللي بتشوفها غلط مبتفكرش تبلغ عنها او تكون ايجابي وتحاول حتى لو بموقف..

اليوم مش مقرف ولا الحياة قميئة ولا اولادك مترَبوش انتي اللي مبتحمديش ربنا علي صحتهم وانهم حواليكي وان لسه في حد جمبك بيقوم يساعدك ويعملك حاجتك.. مراتك مش وحشة انت اللي بطَلت تقولها كلام جميل فبطلت تهتم بنفسها.. جوزك حيعيشك ملكة لو بش شكرتيه على اللي بيقدر يعمله ويمكن دي تكون طاقته..

الأمم مبتنهضش بالفيسبوك ولا بالصور اللي مليانة حكم ونصايح.. 

ومش حتكلم على كمية النقد اللي بشوفها اني لسه متجوزتش وانا خلصت كلية، فتبعاً للمصريين انا بعمل ايه في حياتي؟ وانتوا مالكوا.. مش لازم اهرب من الفراغ اللي الكلية سابتهولي بمسؤلية انا عارفة كويس اني مش قدَها دلوقتي.. مش يمكن انا شايفة اني محتاجة لتخطيط مستقبلي شوية وقت؟ او يمكن انا فعلا فاشلة وبضَيع وقت زي ما نص الناس بتشوف لما تسألني.. في كل الاحوال محدش مضرور من طريقة حياة حد تاني او تفكيره..

الدين نعمة والحمد لله عليها، بس فكَرت تدَور فيه؟ فكرت تكون مقتنع ان الصلاة ذكر؟ وان غض البصر من ترويض النفس؟ وان الفرائض ليس بها نقاش مادمت لست على درجة كافية من الدراية والعلم بالدين عشان تحرَمها او تحللَها؟  امبارح شوفت واحدة بتسأل واحد انه ينصَحها وبغض النظر عن السبب، هيَ بس عايزة تعرف اذا كان الانتحار حلال في حالتها أو لأ.. متعرفش ان قتل النفس من ما حرَم الله وإلا كان زماننا كلنا مموتين نفسنا عند اي لحظة يأس من اللي بنعدَي بيها؟ كارثة من كوارث زمننا..

أحب اقولَك واقولِك ان اللي احنا فيه ده احنا اللي عاملين كده في نفسنا، ربنا خلقنا وادانا عقل ومش معنى انه سبحانه وتعالى يعلم قدرنا انه السبب في اللي احنا فيه او بنعمله ..ربنا ادانا حياة كاملة علشان ندَور بعده ونقتنع، بالعلم مش بالنصايح ومن اهل العلم وبلاش نستنَا ليوم متنفعش المناقشة من شىء..

ومصيبة من مصايبنا سببها ان "من عظَم صغار المصائب ابتلاه الله بكبارها" عن علَي ابن ابي طالب.. زي مالاقي واحدة من اكبر همومها انها اتكعبلت انهارده او ان واحد بجد زقه من قاعدة القهوة وكأن حد جابره يروح هناك كل يوم..

واخيرا  رداً على حجة انا حبقى كويس والناس كلها وحشة، اظن خدت/ي بالك ان احنا من اكتر المجتمعات تأثرا وتقليد لبعض ولو لسه مش مقتنع جرب انهارده انزل الشارع اتعامل بأحسن تعامل وتعالى على ومتبصش للي زنَق عليك وتجري وراه تلَبسه وشوف حيتردلك ازاي المعاملة الكويسة.. 

واما بالنسبة للبداية حاول لو مقتنع تبدأ من غير متستنَى حد يبدأ، خدت بالك كام واحد بيعلق على بوست عندك لو شاف ناس كتير علَقت الاول وازاي بيتفكسلك لو ومحدش بدأ؟ ده بقى اسلوب حياة دلوقتي محدش عايز يبقى مختلف عشان ميسبش فرصة لحد يشوفه او ينتقده.. ومن اكبر انجازاتنا ما لا يذكر..

انا عارفة ان المقال ده ممكن محدش يقراه غيري او اللي ميقتنعش او ميوصلش حتى للاخر، بس انا افضَل اكون ايجابية عن استسلامي لزهق القاريء وشكراً.