تاكل الخيار مقشر ولا متاكلش خيار خالص؟

الخيار جميل وكل الناس بتحبه في السلطة ومخلل والذي منه.. بس انا مبحبش الخيار غير وهو مقشر ولو مش مقشر مش باكله.. وكل ما اقول لحد كده يقوللي الخيار فايدته في القشرة ماشي بس اكله بنص فايدة ولا ماكلش فايدة خالص؟ واجهتني نفس المشكلة في حاجات تانية كتير زي الشغل مثلا.. انا مهندسة اتصالات لسه متخرجة مبقاليش كام شهر ومستعجلة اوي على الشغل بس نفسي في حاجة في مجالي.. وللأسف مجالي في اسكندرية مقتول وفرصه قليلة اوي.. وقدمت في شركة ومتقبلتش فيها.. لقيت اقتراحات الناس اني "امّشي" حالي واشتغل مُدرسة "وخلاص" .. طب انا مش عايزة اشتغل مُدرسة ومش بحب التدريس ولا اعرف حبقى شاطرة في ولا لأ واصلا ده مش مجالي، مش بعد خمس سنين تعذيب اروح ادرس وبعدين سهلة او مش سهلة وانا مالي!؟ انا درست حاجة معينة عايزة انتج فيها واتميز.. التدريس جميل والمعلم مبجّل بس انا مليش فيه! يقولك ما اهو اصل الشغل بيجيب شغل ولو دخلتي حتعملي علاقات شغل، حضرتك انا بقالي خمس او ست سنين بعمل في علاقات ما نفعنيش منها حاجة. بس هي الحياة مقايضة "trade offs" كل لما تاخد حاجة لازم تدّي قصادها.. يعني لو عايز راحة البال في شغلانة اي كلام ومتوجعش دماغك خد دي وخلاص، مُدرسة بقى او ايا كان ايه في غير مجالك.. عايز شغلة في مجالك تبقى تستنى وتتعب وتذاكر وتحسن من نفسك لحد ما تكون جاهز تماماً ليها.. يمكن في اي بلد برة الوضع مختلف بس دي مصر.. فترجع تسأل نفسك كل يوم تاكل الخيارة مقشرة ولا متاكلش خيار خالص؟